Со изведбата на претставата „ Мајка“, по текст на современиот француски драматичар Флориан Зелер, а во режија на Јордан Витанов, викендов зад нас НТ „ Јордан Хаџи Константинов- Џинот“ од Велес, ја започна прославата на јубилејот – 30 години професионална дејност на актерката Зорица Панчиќ. Таа во претставата ја игра улогата на мајката.
- Нам ни останува само споменот на оние утра кога станувавме толку рано за да им направиме појадок, лепчиња со путер и млеко. А, потоа одевме на училиште. Чекоревме по улиците еден до друг, ја носевме малата ученичка чанта за да не се изморат тие премногу. Малите принцови. А, пред училиштето тие нѐ гушкаа со толку доверба. Со толку нежност. Потоа исчезнуваа во училишниот двор со другите синови кои исто така еден ден ќе ги заборават своите мајки за да си го живеат својот живот“, кажа Панчиќ за улогата на мајката.
Покрај Зорица Панчиќ, во претставата која е еден дел од трилогијата на Флориан Зелер „ Мајка, татко и син“, учествуваат и актерите: Васил Зафирчев, Сандра Танчева и Кире Ацевски. Автор на сценографијата е режисерот Јордан Витанов, костимите се на Раде Василев, а изборот на музиката го направи Сашко Костов.
„ Мајка“ е втора постановка од трилогијата на Зелер во НТ-Велес. Во 2022 година режисерот Ненад Витанов“ го постави текстот „ Татко“, а насловната улога му беше доверена на Јордан Витанов.
За прославата на 30-годишната кариера , Зорица Панчиќ ќе се појави и во улогата на „ Госпоѓа министерка“, од Бранислав Нушиќ. Претставата ќе ја режира Синиша Ефтимов.
